Melanotan I neu II

Melanotan I neu II

Enwau stryd

Ubertan

Gwybodaeth Gyffredinol

Y ffasiwn diweddaraf ym maes lliw haul yw dau gynnyrch a elwir yn Melanotan I a Melanotan II. Caiff y ddau eu chwistrellu i mewn i’r croen neu eu cymryd fel chwistrell drwynol ac maent ar gael ar y rhyngrwyd, mewn rhai salonau lliw haul ac mewn campfeydd magu cyhyrau. Mae manwerthwyr yn honni bod y cynhyrchion hyn yn ffyrdd diogel ac effeithiol o gael lliw haul, ac mae rhai hyd yn oed yn awgrymu y gallent ddiogelu rhag canser y croen.

Fodd bynnag, y gwirionedd yw mai cynhyrchion ffug yw’r rhain sydd hyd yma heb eu profi’n iawn. Ni wyddom a ydynt yn ddiogel neu’n beryglus, yn effeithiol neu’n ddiwerth. Mae adroddiad newydd yn awgrymu y gallant hyd yn oed arwain at newidiadau i fannau du ar groen pobl.

Am nawr, dim ond un peth sy’n sicr – mae’n anghyfreithlon i’w gwerthu.

Sut maent yn gweithio?

Mae’r ddau gynnyrch Melanotan yn gweithio drwy gynyddu lefelau melanin, pigment tywyll naturiol sy’n rhoi peth amddiffyniad rhag yr haul.

Mae’r ddau yn fersiynau a wnaed gan ddyn o’r protein naturiol a elwir yn “alpha-melanocyte stimulating hormone”, neu alpha-MSH. Mae’r protein hwn yn annog celloedd yn y croen i gynhyrchu melanin, felly drwy ei ddynwared mae cynhyrchion Melanotan hefyd yn arwain at fwy o felanin yn y croen.

Hyd yma nid oes yr un corff rheoleiddio mewn unrhyw wlad wedi cymeradwyo'r naill gynnyrch.

Yr Effeithiau

• Gall Melanotan ddyfnhau pigment y croen yn debyg i effaith yr haul.

Y Peryglon

Yn y DU, yr asiantaeth Llywodraeth sy’n gyfrifol am wneud yn siŵr bod manteision unrhyw feddyginiaethau yn fwy na’u peryglon yw’r Asiantaeth Rheoleiddio Meddyginiaethau a Chynhyrchion Gofal Iechyd (MHRA). Mae’r MHRA wedi rhybuddio pobl rhag defnyddio Melanotan.

Yn ôl yr asiantaeth, mae’r cynnyrch yn cael ei “hysbysebu a’i werthu’n anghyfreithlon”.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                         

Nid yw Melanotan wedi ei brofi am ddiogelwch, ansawdd nac effeithiolrwydd. Felly ni wyddir beth yw’r sgil-effeithiau posibl na pha mor ddifrifol y gallent fod. Dylai pobl fod yn ymwybodol o hyn pe byddent yn cael cynnig y cynnyrch … Hyd yma mae’r MHRA wedi cysylltu â 18 o wahanol gwmnïau yn egluro bod cyflenwi neu farchnata Melanotan yn anghyfreithlon ac y dylid tynnu unrhyw wefannau ac ati i lawr.

• Mannau du - Mae adroddiad newydd a gyhoeddwyd heddiw gan y British Medical Journal, yn egluro y gall y “tan jab” yma hefyd newid sut mae mannau du ar groen person yn edrych. Mae’r adroddiad yn disgrifio achos dwy fenyw a aeth i glinig croen gyda lliw haul dwys (er bod ganddynt groen golau) a mannau du oedd wedi newid yn gyflym.
  • Roedd y ddwy yn defnyddio gwelyau haul ac ychydig cyn i’w mannau du newid roedd y ddwy wedi chwistrellu Melanotan I a II, a brynwyd dros y rhyngrwyd.
  • Gall mannau du sy’n newid yn gyflym fod yn arwydd o ganser y croen. Y pryder mawr yw y gall Melanton, drwy effeithio ar siâp, maint a lliw mannau du, arwain at ddiagnosis anghywir, braw di-sail neu lawdriniaethau diangen.
• Gan fod y cynhyrchion hyn yn cael eu gwerthu’n anghyfreithlon, nid oes unrhyw ffordd o wybod a ydynt yr hyn y dywedir eu bod, ac nad ydynt wedi eu llygru gan gemegau peryglus. Nid ydym chwaith yn gwybod sut y byddant yn rhyngweithio gydag unrhyw gyffuriau trwyddedig y mae person yn ei gymryd.
• Chwistrellir Melanotan gan ddefnyddio nodwyddau ac os na wneir hynny mewn modd hylan gallai drosglwyddo heintiau peryglus megis HIV a hepatitis o berson i berson.

Y Gyfraith

Gan ei fod heb ei drwyddedu yn y DU, mae’n anghyfreithlon gwerthu Melanotan.